(請注意, 以下內容可能含有嘔心及不雅用語, 心智未成熟的朋友請在家長指引下收看)
每次返大陸, 最驚既其實唔係俾人偷野, 而係去廁所, 講緊係公廁嗰種, 唔知點解由細到大都對大陸既公廁有一種恐懼。記得細個有一次返大陸, 忽然人有三急, 見到前面有個公廁就衝左入去, 真係唔入由至可, 一入就阿彌陀佛, 可能就係咁搞到我有陰影。
嗰個廁所我已經唔知可以用咩黎形容, 與其話係一個廁所, 倒不如話佢只係一間房, 然後左右兩邊貼牆既位置挖左兩條坑, 周圍一塊板一道門都無。現場有差唔多十個叔叔伯伯踎左喺度, 個時仲未有智能手機, 所以場面就係大家你眼望我眼咁睇住對面屙, 至於佢地屙咩我真係唔想知亦唔想去諗。呢一幕視覺上既衝擊真係夠晒震撼, 搞到我差D唔記得左嗅覺上既刺激! 雖然入去前已經聞到個陣濃郁既香味, 但係一入到去個下嗰陣味, 我諗真係就算用晒所有名牌香水去噴都掩蓋唔到, 即使而家回憶返都仲覺得臭。個一刻我已經急到就快賴, 但都係三十六著走為上著。
到今時今日, 雖然國內已經有好多廁所有好大既改進, 不過一D鄉下少少既地方都仲係保留住當時呢D咁有「特色」既廁所。話說有次去上海出差, 經過一個比較古舊既鎮仔, 我個肚又好死唔死呢個時候黎唔聽話, 無辦法之下兜左幾個圈, 終於俾我搵到個廁所。其實未入去我都feel到奶奶地野, 不過我實在太急所以點都要去。個廁所都仲係一條坑個種, 不過前前後後多左幾塊半個人身高左右既隔板, 總算有進步。正當我開始暢快之際, 忽然聽到前面明明傾緊電話既大陸仔發出"哎呀"一聲, 之後伴隨住"啪"一聲, 我好奇向下裝下, 點知俾我就見到一部iphone 5s不偏不倚咁落在我前面個隔既「黃金」堆之中, 真係變成咗名乎其實既「土豪金」。個刻我一方面覺得佢慘, 另一方面又要控制住自己唔好笑得咁大動作, 唔係一個唔覺意叉錯腳落去就真係大檸樂! 之後最令我O咀既係個大陸仔居然徒手插入自己堆黃金入面, 英雄救美咁拎返左自己部iphone出黎, 可惜因為前面隔板擋住左, 我睇唔到佢做左D咩, 但係我聽到佢竟然同電話入面既人講: 「不好意思, 剛才電話掉到屎兒裡面去了, 沒事, 我已經撿了上來。」我好震驚, 當我完事清理走人既時候, 咁啱個大陸仔就同事出黎, 我望左一望佢隻耳仔, 我見到上面有幾撻啡色既物體‥..我希望嗰D只係胎記....
到今日我都覺得, 呢件事比起上海其他景點更加令我難忘, 同時, 我亦都開始明白點解佢地寧願隨便踎喺條街度屙都唔敢去廁所屙, 可能係因為佢地既童年陰影‥
沒有留言:
張貼留言